Ant dance - Fou2ad 7adad

رقصة النملة

يا ارض يا معزّقه
يا حَبابى متبعزقه
يا مخططه و أُ لعبان
عرايانه و محزقه
دايره ما دار الزمان
مضمومه متمزقه
ركبت شعوب ع الحصان
بالرمح مسترزقه
شمشون تخايله الحيطان
و عيونه متخزقه
الليل ما لهش اوان
و الفجر له شقشقه
كان النبى سليمان
ساند على المنسأة
و الجان فى نار الليمان
عطشان و لا من سقى
ع المفترق مهرجان ولاّ على الملتقى
ع الحبل يا بهلوان
و الا سلب مشنقه
نمل فؤاد الحنان
حداد ابو المطرقه
بيقول لى ارقص كمان
و باقول له اسمع بقى
ما تطرطقوش الودان
اكتر ما هىِ مطرطقه
سمسم فتح البيبان
ع البهلى و مبهوأه
سمسم باحب السمان
سمسم على مفتقه
يا هيل يا هيلمان
يا لطف يا زقزقه
شفت النبات حيوان
و البيض كأنه النقا
شفت المصانع غيطان
عينى رجلى متشققه
كان النبى سليمان
ساند على المنسأه
و الجان فى نار الليمان
عطشان ولا من سقى
الماضى كان يا ما كان
و الغد فى الشرنقه
و العلم علم الرهان
و الفن فن الشقا
***
انا كلمتى حكمه
انا رقصتى حشمه
انا شايله دى الحزمه
ايا ظهرى و كلايا
مليم و نكلايه
فجلى و جرجيرى
آه من تجرجيرى
شايلين حجر جيرى
و انا شايله سلاَّيه
لو تحسبوا الحسبه
بالنسبه
بالنسبه
انا شايله جبلايه
انا شايله هملايا
انا نمله نملايه
انا نمله
رجلى يا تلامذه
لا سبعه ولا خمسه
متجانسه
متباعده متلامسه
متكامله
انا نمله
انا دغرى
من صغرى
وفَّرْت لَفَّاتى
و عَدَلت دفاتى
و حسبت مسافاتى
و انا طالعه و انا نازله
انا نمله
انا نمله مش آله
انا عيله مش عاله
بمزامله شغّاله
شغاله بمزامله
انا نمله
لا انا بنت اراجوزه
و لا ست براجوزه
لكن انا العامله
انا النمله
و الحمد لله
انا نمله مش غوله
انا نمله مشغوله
مشغوله بالتموين
و عيالى و مساهم
ما افهمش فى التلوين
يمنعشى فقساهم
ناس باللسان حلوين
بالقلب ما اقساهم
***
انا نمله
انا عامله
مش عاميه
مش قارعه كلوا باميه
مش دميه
الدنيا
الدنيا للعمال

فؤاد حداد